DMart सवलत लिंक स्कॅम: नागरिकांना इशारा

📅 14 Mar 2026

सोशल मीडियावर सध्या “DMart ओपनिंग ऑफर” किंवा “मोठी सवलत मिळवा” अशा प्रकारचे मेसेज मोठ्या प्रमाणावर व्हायरल होत आहेत. या मेसेजमध्ये एक लिंक दिली जाते आणि ती कुटुंब, मित्र किंवा What's app ग्रुपमध्ये शेअर केल्यास मोठी सवलत मिळेल असे सांगितले जाते.

मात्र तज्ज्ञांच्या मते हा पूर्णपणे फसवणुकीचा प्रकार (स्कॅम) आहे. कारण या लिंकचा DMart च्या अधिकृत वेबसाइटशी काहीही संबंध नसतो. अशा वेबसाइट्स फक्त लोकांची वैयक्तिक माहिती (डेटा) गोळा करण्यासाठी किंवा काही वेळा पैसे उकळण्यासाठी तयार केल्या जातात.

या स्कॅममध्ये लोकांना लिंक शेअर करण्यास सांगितले जाते. त्यामुळे जास्तीत जास्त लोक त्या फसवणुकीच्या जाळ्यात अडकतात. काही वेळा अशा साइटवर मोबाईल नंबर, OTP, बँक माहिती किंवा इतर तपशील भरायला सांगितले जाते, ज्यामुळे आर्थिक नुकसान होण्याची शक्यता असते.

विशेष म्हणजे काही ठिकाणी “नवीन DMart स्टोअर ओपनिंग” किंवा “मोठा डिस्काउंट मिळवा” अशा नावाने लोकांना आकर्षित केले जाते. पण हे सर्व खोटे आणि दिशाभूल करणारे मेसेज आहेत.

सायबर तज्ज्ञ नागरिकांना सांगतात की:
अशा अनोळखी लिंकवर क्लिक करू नका
कोणतीही लिंक तपासल्याशिवाय शेअर करू नका
फक्त कंपनीच्या अधिकृत वेबसाइट किंवा अ‍ॅपवरच विश्वास ठेवा
नागरिकांनी “फॉरवर्डेड मेसेज” पाहून लगेच विश्वास ठेवू नये.

स्मार्ट बना, सावध रहा आणि अशा फसव्या लिंक शेअर करणे टाळा.