चंद्रपूर जिल्हा विकासाला चालना : वार्षिक योजनेस २५० कोटींची मंजुरी

📅 25 Feb 2026

चंद्रपूर जिल्ह्याच्या विकासासाठी राज्य शासनाने महत्त्वाचा निर्णय घेत वार्षिक योजनेअंतर्गत सुमारे २५० कोटी रुपयांच्या आराखड्याला मंजुरी दिली आहे. आधी ठरवलेल्या सुमारे १८० कोटी रुपयांच्या निधीपेक्षा अतिरिक्त सुमारे ७० कोटी रुपयांची तरतूद करण्यात आल्याने ग्रामीण भागातील विविध कामांना मोठी मदत मिळणार आहे. नागपूर येथे झालेल्या जिल्हा वार्षिक योजना मंजुरी बैठकीत उपमुख्यमंत्री व अर्थमंत्री अजित पवार यांनी ही माहिती दिली.

बैठकीदरम्यान जिल्ह्यातील विकासकामांसाठी आणखी निधीची मागणीही मांडण्यात आली. राज्याच्या आर्थिक तुटीमुळे निधी मर्यादित प्रमाणात उपलब्ध करून द्यावा लागणार असला तरी पुढील बैठकीत अतिरिक्त मागणीबाबत सकारात्मक विचार केला जाईल, अशी ग्वाही देण्यात आली. जिल्ह्यातील उद्योग आणि खनिज क्षेत्रातील कंपन्यांच्या CSR निधीचा उपयोग अंगणवाडी, शाळा वर्गखोल्या, आरोग्य सुविधा व पाणीपुरवठा प्रकल्पांसाठी करण्याच्या सूचनाही देण्यात आल्या.

जिल्ह्यातील १३९ गावांना वन्यजीवांपासून संरक्षण देण्यासाठी कुंपण उभारणी, तसेच वनपर्यटन, शिक्षण, आरोग्य, शेती आणि पाणीपुरवठा योजनांसाठी अतिरिक्त निधीची आवश्यकता असल्याचेही बैठकीत मांडण्यात आले. मंजूर निधीमुळे ग्रामीण भागातील पायाभूत सुविधा सुधारण्यास आणि नागरिकांच्या जीवनमान उंचावण्यास मदत होईल, अशी अपेक्षा व्यक्त करण्यात येत आहे.